Schottisch-Halbhoch


Mir sin syt dr Fasnacht 16 uf dr Gass,

Hänns immer glatt und immer Spass.

Während dr Ruedi duet singe,

(Wenns denn wett glinge),

Duet d Luana kli in de Gedangge schwelge,

Und zeigt (meistens) die richtige Helge.

Friehner no mit Örgeli,

Ohni Kummer ohni Sörgeli,

Sy mir syt em Zystig ander Fasnacht,

2019 au ohni Instrumänt e Pracht.

Mir sy nur - jä mergg dir dass,

An dr Prattler Fasnacht uf dr Gass.

Und sunst kaschs versueche,

Uns einisch z bueche.



Im Joor 2015 hett dr Ruedi d Wageclique Rhy-Waggis gründet. Näbebyy denn au dr Schnitzelbangg Schottisch-Halbhöch.

Dazumal hett no dr ehemoolig Vize-Obmaa vo dr Clique dr Helge ghebt und zeigt.

So sy mir denn an dr Fasnacht 2016 s erstmol z Prattele uf d Route gange.

Im 2017 hetts denn e neui Larve gäh (siehe Bild). Au es Örgeli und scheeneri Helge.

Doch dr Silvan hett noch dr Fasnacht 2017 d nase voll gha vo de Bängg und hett ufghört.

So isch denn im 2018 us em Silvan e Natascha worde.

Mit Ihre hett s au e kleini änderig im name gäh. Us Schottisch-Halbhöch isch Schottisch-Halbhoch worde. Das hett aber nüt mit dr Natascha ztue gha, sondern will mir e probejoor by de "Bängg fir Basel" gmacht hänn.

Nach dr Fasnacht hetts e grunderneuerig gäh.

Neui Kostüm und e neus Mitglied: d Luana.

Sie isch s erstmool im 2019 uf d Gass gsy und hett ihri Ufgob als Hegeträgerin super gmeisteret. S Örgeli isch aber blybe.... ämmel am Fasnachts Sunntig 2019. Denn am Zystig isches dyheim vergässe gange so ass mir e neui Melodie miteme Refrain hänn miesse näh.  Das wärde mir im näggste Joor by bhalte.

D Luana und dr Ruedi ghöre natürligg au ze de Rhy-Waggis ufe Wage. Er als Obmaa und sie als Vize-Obfrau.

s neue Kostüm syt dr Fasnacht 2019
s neue Kostüm syt dr Fasnacht 2019

Do kasch dr Uftritt vo uns an dr Prattler Fasnacht 2019 in Ricos Bar gseh.   ⤵️


s'Kuni usem Gundeli


S'Kuni usem Gundeli isch en Schnitzelbangg wo z Basel unterwäggs isch.

S'Kuni isch im Joor 2018 ins Läbe gruefe worde und im 2019 am Fasnachtsmäntig s erstmol uf d Gass und zwoor ellei. Am Mittwuch hett sich denn zem Kuni no s Hündli also dr Rainer derzue gsellt als Helgeträger.

S Hündli wird au in Zuekunft derby blybe.


Als Refrain zwische de Värs hänn mir:

Es isch so lustig tralla la la la   überall d Schnure dinne z ha.


Mir ghöre ze keinere Gsellschaft sy also wild by dr IG WuF derbyy.


Do no s Video vom 2019.  S isch aneme Geburtstag nach dr Fasnacht gsy drumm hetts nit nur Värs vo dr Fasnacht druff...





Kontaggt: Ruedi Gysin

Mail: schottischhalbhoch@gmail.com